Breaking News

புலம்பெயர் சமூகத்திற்காகவே கோட்டாவை கைது செய்ய அரசு நடவடிக்கை



புலம்பெயர் சமூகத்தின் எதிர்பார்ப்பை நிறைவேற்றவே முன்னாள் பாதுகாப்புச் செயலாளர் கோட்டாபய ராஜபக்சவை ஸ்ரீலங்கா அரசாங்கம் கைது செய்ய வகைதேடுவதாக குற்றம் சாட்டப்பட்டுள்ளது.
இந்தக் குற்றச்சாட்டை பேராசிரியர் மெதகொட அபேதிஸ்ஸ தேரர் முன்வைத்துள்ளார்.
எதிர்காலத்திற்கான ஒளி என்ற அமைப்பு ஏற்பாடு செய்திருந்த ஊடகவியலாளர் சந்திப்பு கொழும்பில் இன்றைய தினம் நடைபெற்றது.
முன்னாள் பாதுகாப்புச் செயலாளர் கோட்டாபய ராஜபக்சவை கைது செய்வதற்கான முயற்சிகள் இடம்பெறுவதாக தென்னிலங்கையில் செய்திகள் வெளியாகியிருக்கும் நிலையில் இது தொடர்பாக பேராசிரியர் மெதகொட அபேதிஸ்ஸ தேரர் கருத்து வெளியிட்டார்.
“தற்போதைய ஜனாதிபதி மட்டுமல்ல, முன்னாள் ஜனாதிபதி மற்றும் பிரதமர், அமைச்சர்கள், அப்பாவி குழந்தைகள் உட்பட இந்த நாட்டிலுள்ள அனைத்து மக்களது நெற்றி மீது துப்பாக்கியை வைத்த சந்தர்ப்பங்களில் அதேபோன்று திகதியை மட்டும் குறிப்பிடும் அளவுக்கு மரணச் சான்றிதழை கையில் வைத்துக் கொண்டு நாட்டை இரத்த ஆறாக மாற்றியிருந்த நிலையில் நாட்டைக் காப்பாற்றிய கடமையில் இருந்தவர்தான் கோட்டாபய ராஜபக்ச.
அவரது அந்த நடவடிக்கையானது தமிழீழ விடுதலைப் புலிகள், புலம்பெயர் சமூகம், விடுதலைப் புலிகளை பலமடையச் செய்த சர்வதேச அமைப்புக்களுக்கும் பேரடியாக அமைந்தது. அதனால் கோட்டாபய ராஜபக்சவை ஒருநாளைக்காவது கைது செய்து, சிறை வைப்பதானது அவர்களது கனவும், எதிர்பார்ப்புமாகும்.
தற்போது இந்த நாட்டில் இராணுவத்தினரை வேட்டையாடுவதோடு யாழ்ப்பாணம் பல்கலைக்கழகத்தை மையப்படுத்தி அங்கு விடுதலைப் புலிகளை நினைவுகூர்ந்தனர். அதற்கு அவர்கள் உயிரிழந்தவர்களை நினைவுகூர்வதாக கூறினாலும் அதனை மே 18ஆம் திகதியே செய்யவேண்டும். எனினும் தமிழீழ விடுதலைப் புலிகளின் தலைவரது பிறந்தநாளை அவர்கள் ஸ்ரீலங்கா அரசாங்கத்தின் அனுசரணையுடன் கொண்டாடுகிறார்கள்” என்றார்.

No comments